નાઇલને કિનારેથી….

સમૃદ્ધિ…..વિચારોથી, વાણીથી, વર્તનથી, અનુભવથી!

Tag Archives: ભીખ

તો એ છે ભીખ માંગવાની એક નવી ઢબ…

અહીં કેરોમાં પાછલાં અમૂક વર્ષોથી ભીખ માંગનારાઓનું પ્રમાણ ઘણું વધી ગયું છે. યુઝુઅલી સોફિસ્ટિકેટેડ, સૂટબૂટમાં તાજામાજા નાહીને નીકળ્યા હોય એવા બુઝુર્ગ આદમીઓ, જીન્સ ટી-શર્ટ પહેરેલી જુવાન બાઈઓ અવારનવાર રસ્તામાં જતી વખતે ક્યાંકથી ટપકી પડે છે, અને પછી શરુ કરે છે એમની વિવિધ માંગણીઓ..

* — “સાહેબ! મારી ગાડીનું પેટ્રોલ ખલાસ થઇ ગયું છે. આમ તો ૧૦૦ પાઉન્ડનું જરૂરી છે પણ અત્યારે ૫૦નું પણ ભરી આપશો તો મહેરબાની. કે પછી…

* — “એ દોસ્ત! હું એલેક્ઝાન્ડ્રીયા શહેરમાં રહું છું. મારી પાસે ટિકિટના પૈસા ખલાસ થઇ ચુક્યા છે. ૫૦ પાઉન્ડ આપીશ તો તારું એહસાન.” યા તો..

* — “મારી દીકરી હોસ્પિટલમાં તડપી રહી છે. ઓપરેશન માટે એક પણ રકમ નથી. આ ડોક્ટરના પ્રિસ્ક્રીપ્શન માટે જો તું મદદ કરશે તો તારું ભલું થશે…” વગેરે..વગેરે…

ચાલો એ તો સમજ્યા કે આવી ઘટનાઓ બીજે ક્યાંક પણ બનતી રહેતી હશે. પણ થોડાં જ દિવસ અગાઉ ઘરની બહાર એક કૌતુક દીઠું. લઘરવઘર હાલતમાં એક બાઈએ અહીંની સફેદ કેરો ટેક્સીમાં છત પર મોટું સ્પિકર મુકીને, ડ્રાઈવર સાથે અંદર બેસી માઈકમાંથી અરેબિકમાં રીતસર ભીખની આજીજી કરી. જે મારી લાઈફમાં મેં પહેલી વાર જોયું.

શરૂઆતમાં તો લાગ્યું કે કોઈ ચૂંટણી પ્રચાર હશે (જો કે એ પણ તો એક તરેહની રાજકીય ભીખ જ છે ને!) -પણ જ્યારે તેના અવાજમાં ધીમે ધીમે આંસુઓ ટપકવા લાગ્યા ત્યારે ટેકસીની આસપાસ આવીને કેટલાંક લોકોએ તેને મદદ પણ કરી. અને બાઈએ શાનદાર અદાથી સારી એવી રકમ એકઠી પણ કરી લીધી.

પન્નાલાલ પટેલનું ક્વોટ છે: “ભૂખથીયે ભૂંડી ભીખ છે.” ત્યારે મને થાય છે. કે રેવોલ્યુશન પછી કેરોની હાલત એટલી તો કથળી નથી જ કે આવી રીતે ભીખ માંગવાનો નવો વેપલો શરુ થાય.

નિલ’અંબર’ 

” જેમને ખુદની ઉપર પૂરેપૂરો ભરોસો છે તેઓ ખુદાના ભરોસે બેસી નથી રહેતા. અલ્લાહ તો દેતા હૈ, પર બંદા કહા લેતા હૈ?!?!”

Advertisements