નાઇલને કિનારેથી….

સમૃદ્ધિ…..વિચારોથી, વાણીથી, વર્તનથી, અનુભવથી!

Tag Archives: મોબાઈલ

સાહસ અને હસાહસનું સર્વનામ એટલે….

Sir Richard Branson

મને આ અંગ્રેજ બચ્ચો સર રિચાર્ડ બ્રાન્સન સીધેસીધો ગમે છે. જો લિસ્ટ બને તો એટ-લિસ્ટ બાવીસ કારણો મળી શકે. એટલાં માટે કે તેઓ મ્હોરા-માસ્ક વગરના ચહેરાવાળી વાઈબ્રન્ટ ઝિંદગી જીવે છે.

કોઈ દંભ નહિ, કોઈ ખોટો મુખોટો નહિ. અસલી ચેહરો, બિન્દાસ્ત-બેફિકર… જીવન. જે કરે છે તે ખુલ્લે આમ. ટોટલ ‘વર્જિન’ રહ્યા વિના, સદાબહાર ગ્રીન.

(આવું હું ‘સાવચ્ચ થોરાક’માં એટલાં માટે કહી શકું કે થોડાં વર્ષો પહેલા મુંબઈમાં ગેટ-વે-ઓફ ઇન્ડિયાની પાસે મેં તેમને દેશ- વિદેશની ‘ફેશન અપ્સરાઓ’ની વચ્ચે એમને કોઈક એડ-કેમ્પેઈન માટે ફોટો-સેશન કરતા જોયા’તા….બેપરવાહ!!!!)

એમની નસેનસમાં સનસનાટી સર્જવાની તન કી શક્તિ મન કી શક્તિ ભારોભાર રહેલી છે. તેમની કંપની ‘વર્જિન ગ્રુપ’ને પણ દરરોજ તરોતાઝા રાખી સમયાંતરે મિડિયાનાં કેમેરામાં સતત લાઇમલાઈટ બતાવતા રહે છે. 65 વર્ષે એમણે ડોસો કેહવું એ બુઢાપાનું અપમાન કહી શકાય. બુઢા હોગા ઉસકા દાદા !

અત્યાર સુધીની તેમની ઝિંદગીની સફરનું લેખું જોખું જોઈએ તો દરેક દિવસ એમના અને એમણે ઓળખનાર દરેક માટે કેસ-સ્ટડી જેવો બને. બાળપણથી જ ‘સાહસ અને હસાહસ’ નામના ફેકટર્સને તેમની મા એ ગળથુથી સાથે પીવડાવી છે.

એમને બસ કોઈક વર્જિન ‘પ્રોબ્લેમ’ દેખાવો જોઈએ. એમાંથી તેઓ ધંધો શોધી કાઢી પૈસા બનાવવું શરુ કરી દે છે. પછી જો હોગા દેખા જાયેગા જેવી અજબ અને ગજબ મર્દાનગી સાથે તેમાંથી સોલ્યુશન આપતા રહે છે. એટલે ઉદ્યોગ સાહસિકની વ્યાખ્યા સમજવાની ન હોય રાજ્જા…એ તો આવા રાજાઓને જોઈને જ શીખવાની હોય.

(હવે આટલું તો હું એમના સાત પુસ્તકોમાંથી ફકત ‘લૂઝિંગ માય વર્જિનીટી’ અને ‘સ્કર્યું ઈટ, લેટ્સ ડૂ ઈટ’ વાંચ્યા પછી કહી શકું છું.)

એમના પુસ્તકો ‘સફળતાની કથાઓ’ નહિ, પણ ‘નિષ્ફળતાની કહાની’ કેટેગરીમાં મૂકી શકાય. જેના પાને પાને આ વિલાયતી કાદુના ડાયરા સંભળાય છે. અને એ પણ ડુંગરે નહિ, ટાપુઓ પર.

ટાઈમ હોય તો ખાલી આ લિસ્ટ પર પણ નજર મારી તેના પુસ્તકોના પ્રિવ્યુ વાંચશો તો પણ અટકાયેલાં કોઈક કામની વર્જિનીટી તૂટશે એની ગેરેંટી.: http://amzn.to/1NtzHMV

વર્જિન મોરલો:

“જે ડરે, એ રડે.
જે ખસે, એ હસે”

(આમ તો આ ક્વોટ રિચાર્ડબાબજીનું સમજી વાંચવાનું….બાકી આવું લખવાનું મને પણ સૂઝ્યું એમની અનેકાનેક ઓડિયો-વિડીયો ચેનલ્સ માંથી.)-

તો બોલો, આજે તમને કયો ગઢ જીતવો છે?

(Image Credit: http://99u.com)

Advertisements

ચોંકાવનારા (અને ચમકનારી) ઈન્ટરનેટની કેટલીક અવનવી ખબરો….

 કહેવાય છે કે…

•=) યુ.એસ.એ.માં લગભગ ૨૫૦ મિલિયન ઈન્ટરનેટ યુઝર્સ છે. જ્યારે ચાઈનામાં તેના ‘ડબ્બલ કરતા બી વધારે’ પોણા-છસ્સો યુઝર્સ છે.

•=) ભલેને ફેસબૂક પર આખી દુનિયામાંથી ૧.૧૧ બિલિયન યુઝર્સ હોય છતાં તે ચાઈનામાં પ્રવેશી શક્યું નથી. કેમ કે ત્યાં એ ‘બેન્ડ’ થયેલું છે.

•=) હવે તમે એમ ધારતા હોય કે…એમેઝોન.કૉમ દુનિયાની સૌથી મોટી અબજોનો વેપલો કરતી ઈ-કોમર્સ સાઈટ છે. તો જરા એટલું જાણી લો કે તે હજુયે ખાંડ ખાય છે. કેમ કે અલીબાબા.કૉમ એ એમેઝોન.કૉમ અને ઈ-બે.કૉમના ટોટલ કરતા આગળ છે.

•=) ૨૦૧૫ સુધીમાં જ કદાચ ડેસ્કટોપ કોમ્પ્યુટરનું સ્થાન ટેબ્લેટ કોમ્પ્યુટર લઇ લેશે. કારણકે…..જગ્યા અને સાધનની જુગલબંધીની સહુલીયત એમાંથી મળી ગઈ છે.

•=) અલ્યા એય ફેસબૂક ! તું ભલેને દરરોજ ૩૦૦ મિલિયન જેટલાં ફોટોગ્રાફ્સ અહીં ઠાલવે જાય છે. પણ તારી પાછળ તારું માર્કેટ કબજે કરવા સ્નેપચેટ.કૉમ અને પિંટરેસ્ટ.કૉમ નામના બે નાનકડાં બાળ રાક્ષસો ખૂબ ઝડપથી મોટા થઇ રહ્યા છે. સાવધાન !

•=) ગૂગલ અર્થ (કે મેપ)ના ફોટોગ્રાફ્સ તૈયાર કરવામાં તેનો સ્ટાફ જેટલું ચાલ્યા કે દોડયા છે કે પૃથ્વીથી ચાંદ સુધી લગભગ ૧૦ વાર આંટાફેરા મારી શકાય. (અને આપણે આરામથી માત્ર માઉસ ફેરવ્યા કરીએ છીએ)

•=) એ તો જગજાહેર થઇ ગયું છે કે…યુ-ટ્યુબ પર અત્યારે એક વર્ષમાં એટલો વિડીયો અપલોડ થઇ રહ્યો છે કે જો હોલીવૂડને તેનો ઉપયોગ કરી એક લાંબી ફિલ્મ તૈયાર કરવી હોય તો માઆઆઆઆત્ર ૪૩,૦૦૦ વર્ષ જ લાગે. (ને ત્યાં સુધીમાં તો બીજાં કેટલાં વર્ષનું બીજું નવું ભાથું બંધાઈ ગયું હોય?!?!?!?)

તો દોસ્તો, હવે તમે જ પૂછશો કે…”આમાં આપણા કેટલાં ટકા?” – તો સાહેબ જણાવી દઉં કે…આ ટેકનોલોજીને ધક્કો મારવામાં ૨૮%થી પણ વધું એવા ભારતીયોનો ‘પાછળથી’ ફાળો રહ્યો છે.

– જય (બહાર) ભારત !

” થેંક યુ એષા !”

Esha Khare

પ્લગ ભરાવો અને ૨૦ સેકન્ડ્સમાં જ મોબાઈલની બેટરી ચાર્જ….

દોસ્તો, થોડાં મહિનાઓ બાદ જો આવી સુપર-ફાસ્ટ મોબાઈલ ચાર્જિંગ સહુલિયત આપણને મળતી થઇ જાય ત્યારે એક વાક્ય બોલવું પડશે… “થેંક યુ એષા.”

મિસ એષા ખરે. ગઈકાલ સુધી અજાણ્યું રહેલું આ નામ આજે રાતોરાત ટેકનોલોજીના ક્ષેત્રે ખરુ ઉતર્યું છે. ૧૮ વર્ષની આ ભારતીય અમેરિકન દિકરીએ એવા LED based સુપર-ચાર્જરની શોધ કરી છે. જેના કારણે ગઈકાલે જાહેર થયેલા ઇન્ટેલ ફાઉંડેશન ઓફ યંગ સાયન્ટિસ્ટનો ૫૦,૦૦૦/- ડોલર્સનો એવોર્ડ આ ‘ખરે’બૂન ખાટી ગઈ છે.

વારંવાર ખલાસ થતી તેની મોબાઈલ બેટરીને કારણે દિમાગથી ડિસ્ચાર્જ થતી એષાએ થોડાં જ મહિનાઓ પહેલા જોયું કે માર્કેટમાં હજુ સુધી એવી કોઈ બેટરી નથી કે જેને લીધે પળવારમાં મોબાઈલમાં જાન લાવી શકાય. બસ એક ધૂન સવાર થઇ અને તેને સાથ આપવા માટે તે અરસામાં ઇન્ટેલ કંપનીએ તેનો યંગ સાયન્ટિસ્ટ એવોર્ડ પ્રોગ્રામ જાહેર કર્યો.

પહેલા દિમાગને અને પછી તેની સ્કૂલમાં શીખેલા ઇલેક્ટ્રોનિક્સના જ્ઞાન વડે સુપરકેપેસિટર્સની ડિઝાઈન કરી તેને પાવરપેક બનાવી એષાએ આ ટેકનોલોજીને ઇન્ટેલના વિજ્ઞાન-મેળામાં પ્રદર્શિત કરી.

મોબાઈલ મોરલો:

“દિકરો કે દિકરી ‘બારમું’ ભલે કરે. પણ તેમના દિમાગનું ‘તેરમું’ ન થાય એટલો સાથ-સહકાર જરૂર આપશો.”

ભાગ-૨ || શું તમે પણ આ રીતે દુનિયા છોડી શકો છો?

Paul Miller- theVerge.com

દોસ્તો, પાછલા સમાચારથી અપડેટ થવા આ પોસ્ટની લિંક મેળવી લેશો. 

૧લી મે ૨૦૧૩ના દિવસે પૌલ મિલર જ્યારે એક વર્ષિય ડિજીટલ-ઉપવાસ કરી (અન)‘રિયલ’ થઇ ઈન્ટરનેટની દુનિયામાં પાછો ફર્યો ત્યારે તેની કંપની વર્જ.કૉમની સાથે વિશ્વના ચંગી અને જંગી બ્લોગ-મીડિયાની ‘એક્ટસી’ નજર પણ તેના પર રહી.

તેના ખુદના જ શબ્દોમાં જ્યારે તેણે એ ૩૬૫ દિવસી ઝિંદગીનું સરવૈયું બયાન કર્યું છે. તે વાંચ્યા પછી મને ખુદને તેના વિશે કેવો પ્રતિભાવ/અપડેટ આપવો તેની મીઠ્ઠી મૂંઝવણ થઇ ગઈ. માટે બીજા જ દિવસે તેની પર લખવાને બદલે આજે એક વિક પછી કાંઈક સૂઝયુ છે.

તેના અપડેટમાં જે શબ્દો તેણે દિલમાંથી લખ્યા છે, તેવું લખવા આપણે તેના દિલમાં ઘૂસી આંગળીઓ વાટે બહાર નીકળવું પડે. છતાં તેના જ ઇન્ટરનેશનલ શબ્દોને નેશનલ ટચ આપવાની કોશિશ કરી છે.

“૩૦મી એપ્રિલ ૨૦૧૨ની રાતે ૧૧:૫૯ કલાકે જ્યારે મેં મારા કોમ્પ્યુટરના પાવરનો, ઈન્ટરનેટ-વાઈ-ફાઈના કેબલનો, ટેલીવિઝનનો, અને મોબાઈલના ચાર્જરનો પ્લગ છૂટો કર્યો, ત્યારે શરીરમાંથી એક લખલખું પસાર થઇ ગયું. કેવી લાઈફ બનશે? કેવા ફેરફારો, કેવો અનુભવ થશે?- લાગે જાણે બધું જ એક સસ્પેન્સ કથાની શરૂઆત….

એક ઊંડો શ્વાસ લઇ ખૂબ શાંતિથી મારા પહેલા દિવસની શરૂઆત થઇ ત્યારે સામે ન તો કોઈ ફોન, ન કોઈ સમાચારો કે ન કોઈ છાપું…માત્ર હું અને મારા મગજનો થોડો બાકી રહેલો ‘શાંત કોલાહલ’ !

કમાણીની ફિકર?- નો વે!…એટલા માટે કે વર્જ.કૉમના મારા બોસે મને ચાલુ પગારે પૂરા વર્ષ દરમિયાન જુના ધરોબાયેલાં સ્વપ્નાં, બાકી રહેલી ઈચ્છાઓ, કામ કરવાની છૂટ સાથે છુટ્ટી પણ આપી દીધી હતી. એટલે ક્રિકેટ-કિટ સાથે આઝાદ-મેદાન પણ મારી પાસે જ હતું એ લોકો તો માત્ર ફિલ્ડીંગ ભરી રહ્યા…

પુસ્તકોના પોટલાએ, કાગળોના કન્ટેનરે, ભૂલાઈ ચૂકેલાં અને પછીથી મળી આવેલા અગણિત સ્વજનો-દોસ્તોએ એક અનોખું પ્રેરકબળ પૂરું પાડ્યું. જેઓને મારી અને મને જેમની જરૂર હતી તે સૌને પહેલી વાર (ને પછી વારંવાર) જાતે મળવાની-જાણવાની-ખોળવાની તકો મળી. વર્ષો સુધી ‘ડમ્બ’ જણાયેલો લેખિત-પત્રવ્યવહાર તો સ્માર્ટ-ફોનની સામે સાચે જ ‘સ્માર્ટ દેખાયો’.

સોસાયટી-કોમ્યુનિટીના હોલમાં મેળાવડા વખતે ‘જુનવાણી’ દેખાતા વડિલોમાં મને જ્ઞાનનો પાવર વધારે દેખાયો. ને જ્યારે કોઈક ખૂબસૂરત માનૂનીએ અદ્રશ્ય થઇ મને પોતાના હાથથી માત્ર એટલો જ મેસેજ મોકલ્યો કે “તે જે કાંઈ કર્યું છે, તે સારું જ કર્યું છે.” ત્યારે એ પત્રએ વારંવાર ‘પાવર-હાઉસ’ની ગરજ સારી છે.

મને સાચે જ એવી અદભૂત લાગણી થઇ છે એક વર્ષમાં હું ખુદ ‘રિયલ’ બની બહાર આવ્યો છું. મેં મારી જાતને મારી સાથે આટલી નિકટ ક્યારેય જોઈ ન હતી. કનેક્ટીવીટીની સાથે ડીસકનેકટેડ થયેલો હોવા છતાં ખુદની સાથે ‘કનેક્શન’ ફરી વાર એવું સ્થપાયું છે કે હવે માત્ર ‘એ લઇ લેવું, તે લઇ લેવું’ કરવા કરતા આપી દેવામાં વધારે ખુશીઓ મળે છે.  

હાથમાં પ્રિન્ટેડ નકશો લઇ સાયકલ પર અજાણી જગ્યાઓએ એકલો ભમી આવ્યો. જેનાથી નાકે ધૂળ ઉડાડતી ‘ફ્રીસ્બી’ ડીશ રમી આવ્યો, હોમરની ‘The Odyssey’ ના ૧૦૦ પાનાં એક સાથે વાંચી આવ્યો. Les Miserables નાટક જોયા પછી આંખો બંધ કરી રડી આવ્યો. pભાડે રાખેલા પોસ્ટ-બોક્સમાં આવતાં દોસ્તોના, વાંચકોના પત્રો વાંચી દિલ ખોલી હસી આવ્યો. અને હવે જાતને એવી પ્રાર્થના પણ કરું છું કે આ બધું જ સમયાંતરે ચાલુ રહે…

ઓફકોર્સ, એક પણ દોસ્ત ન હોવો એ કરતા ફેસબૂક દોસ્તની પણ એટલી જ જરૂરીયાત લાગી છે, પળવારમાં હજારોને મન:સ્થિતિનો મેસેજ મોકલી શકતું ટ્વિટર ખૂબ મીસ કર્યું છે. ઘણું અગત્ય લાગતું કામ SMS થકી જલ્દી પૂરું થઇ શક્યું હોત જેની ખોટ ખૂબ રહી છે. પણ હવે લાગે છે કે…આ બધી જ સગવડોનું રિમોટ-કંટ્રોલ આપણા ખુદના હાથમાં જ છે. બસ જરૂરીયાત મુજબ તેનો ઉપયોગ કરાય તો સફળતાનું ટોનિક તમારી સામે હાજર થાય.

મારી પાંચ વર્ષની ભાણી કેઝીયાને છેલ્લાં દિવસે સવાલ કર્યો. કે “તારા મતે ‘ઈન્ટરનેટ એટલે શું?”- ત્યારે અવાચક નજરે તે મારી સામે જોઈ રહી. પછી કોમ્પ્યુટર પર રહેલા ‘સ્કાઈપ’ નામના પ્રોગ્રામને આંગળી ચીંધી ઓળખી બતાવ્યું ત્યારે થયું કે એની માસૂમ દુનિયા હજુ આટલી જ ‘વિશાળ’ હતી. પછી આગળ પૂછ્યું કે “તો પછી તું આટલાં વખતથી મારી સાથે વાતો કેમ કરતી ન હતી?” ત્યારે તેના ‘ટંગી’ જવાબ પર મારા આંસુઓ પડી રહ્યા હતાં:

“મામા ! મને લાગ્યું છે કે તમને જ મારી સાથે વાત કરવાનો સમય અને રસ નહિ હોય.”

એટલે હવે આજે (ગયેલી નહિ) પણ સાચે જ મળી આવેલી ખુશીઓ વહેંચવાની આદત ટકાવી રહ્યો છું…..તમારા સૌના સાથ-સહકારથી…”  

મિલરી મોરલો: “જે ત્યજી શકે છે તે વધારે મેળવે છે.”

(મૂળ લેખ અંગ્રેજીમાં વાંચવા આ લિંક પર આવશો: http://bit.ly/10smvtX )

‘માઉસ પકડો, મોબાઈલ ઉઠાવો’ અભિયાન…

એલેકઝાન્ડ્રા સાઉથ આફ્રિકામાં આવેલું જોહાનિસબર્ગ શહેરની પાસે આવેલું ટાઉનશીપ છે.

ત્યાં ૩ પ્રોબ્લેમ્સ બહાર આવ્યા છે. 

૧.  ઉંદરોનો ત્રાસ – આ ટાઉનશીપ ઘણી વાર એમ લાગે છે કે માણસો કરતા માઉસનો વસ્તી-‘રેટ’ બહુ ઉંચો છે.
૨.  ટ્રાશ (કચરા)નો ત્રાસ. – ગંદકીથી ધમધમતા આ ટાઉનમાં કચરો તેમની શહેરી એકત્રિત થયેલી પેદાશ છે અને ઉંદરો માટે ખાદ્ય. ૩.  સ્માર્ટ-મોબાઈલ યુગમાં હજુયે ત્યાં સેલફોન (નોકિયાનો પેલો સૌથી જુનું મોડેલ પણ હજુ ત્યાં નવા જેવો) વાપરવો બહુ મોંઘો પડે છે.વાત એમ બની કે…થોડાં અરસા પહેલા એલેકઝાન્ડ્રા સીટી-કાઉન્સિલમાં કોઈક કાળુભાઈને થોડી સુબુદ્ધિ સૂઝી કે આ પ્રોબ્લેમ્સનું મર્જ કરી લાભ ‘લેવામાં’ આવે તો પ્રજાને પણ કાંઈક ‘સુખનેસ આપી’ શકાય. ને એ બહાને ડેવેલોપમેંટ જેવું થોડું કામ પણ થઇ શકે.

ને શરુ થયું એક ટાઉની અભિયાન. “બસ! ૬૦ ઉંદર પકડો ને એક મોબાઈલ લઇ જાવ.” – હવે ત્યાંની સ્થાનિક પ્રજામાં ખુશહાલી તો સર્જાઈ છે પણ થોડુ ઉદાસીન પણ બન્યું છે.

• : ખુશહાલીનું કારણ: “આહા ! હવેથી ઉંદરને બદલે મોબાઈલ રમાડવા મળશે. યેએએએએએએ!!!!!!”- પણ ‘મોડેલ’ કયું મળશે એ સંસ્થા હજુ નક્કી કરી રહી છે. 

• : ગમગીનીનું કારણ: જ્યાં ખુદ ટાઉન પોતે કચરાના ઢગ પર વસ્યું હોય ત્યારે એમનું વધેલુ એંઠું જમણ પછી જમશે કોણ?- અને કચરો ઓછો થશે તો ઊંઘ કેમ આવશે? (એક નાગરિકે તો ખુલ્લેઆમ એમ પણ કહી દીધું છે કે “અમારા ઉંદરોનો સૌથી પ્રિય ખોરાક ‘વપરાયેલા કોન્ડોમ્સ છે. એની ચિંતા હવે અમને વધુ થઇ રહી છે, બ્વાના !!!”)

જો કે..હાલમાં તો હજુ વાત થઇ છે. અમલની વાત વાશે ત્યારે વધુ વાત. અત્યારે તો કેટલાંક વિરોધી તત્વો આવા આડા કામમાં ઉભા થયા છે. પણ એમાં જે થશે તે સારું જ થશે. કેમ કે…એક વાર મોબાઈલ હાથમાં પકડાયા પછી કોઈક એવો કોપી-‘કેટ’ પણ આવશે જે ‘ઉંદરપકડ’ નામની ‘એપ’ (એપ્લિકેશન) પણ તૈયાર કરી આપશે. 

હવે જતાં જતાં પ્રાપ્ત સૂત્રો કે અનુસાર…

એ સાચી વાત છે કે આ એલેકઝાન્ડ્રા ટાઉન નેલ્સન મંડેલાજીનું પહેલું શહેર હતું જ્યાંથી તેમણે પોતાના ‘સાઉથ આફ્રિકન્સ’ માટે ચળવળ શરુ કરી હતી. હવે એમના બદલે ત્યાંની કાઉન્સિલે આવું અભિયાન શરુ કર્યું છે, એટલે લોકો ઉંદર પકડવા ‘મંડેલા’ છે. 

ફરક માત્ર એટલો છે કે…પહેલે સરફરોશી થી…પર અબ મોબાઈલફરોશી હૈ!

Are We Really Independent? – શું ખરેખર આઝાદી મળી છે? નો નો નો…

શું ખરેખર આઝાદી મળી છે? નો નો નો….

અંગ્રેજોની ગુલામીમાંથી મુક્ત થયા એટલે આઝાદી?- કોણે કહ્યું….પ્રભુ!?

• જન્મથી જ આપણા કુટુંબ, સમાજમાંથી આપવામાં આવેલા ખોટાં (ને પછી ખાટા) પૂર્વગ્રહોની ગુલામગીરીના શું ખબર છે…..બચ્ચે?

• સ્કૂલમાં ‘ભણ ભણ’ કરાવીને દબાવવામાં આવેલી ક્રિયેટિવિટીનું અત્યારે અપડેટ કેમ છે…..બેટા?

• કોલેજમાં વધારે પોપ્યુલર (અને રોકડી કરી આપતા) એવા ‘સજેસ્ટેડ’ વિષયોને જ મહા-પરાણે ઉતારી છુટ્ટા થયેલા સમયને કેમ પાછો વાળી શકીશું…..દોસ્ત?

• જખ મરાતી હોય અને ના છુટકે ન ગમતી નોકરીએ લાગી મા-બાપને ખુશ રાખવાના ‘ગમ’ની ગુલામગીરી ક્યાં ચીટકાવીશું…..બાપ?

• ‘કસ્ટમર ઇઝ કિંગ’ જેવું સાવ ખોટું વાક્ય સ્વીકારી લઇ…..ગ્રાહકને એક દોસ્ત તરીકે જોવાની માનસિક સ્થિતિ ક્યારે બનાવીશું……શેઠ?

• ‘ઘેંટાઓના ટોળાં’થી બનેલાં નિયમોને અંધ બની પાળતા રહેવાની મજબૂરી યુક્ત ગુલામગીરીને કેમ કરીને તોડવી….સાહેબ?

• અરે! આપણા જ ભાઈ-બંધુઓથી બનેલી અમેરિકન મોબાઈલ ટેકનોલોજીને કોરિયાના મોબાઈલમાં નાખી, ફિન્લેન્ડી રીંગટોન્સને ગાળો ભાંડવાની ગુલામીમાંથી કેમ કરીને છૂટવું….સરજી!?

• બેસણા કે ભ’ઈ-બોન પૈણાવવામાં બ્લેકબેરી/આઈફોન પર સતત સેક્સી મેસેજીસ વાંચવાની ટેક્સીમાં ફર્યા રહેવાની ગુલામગીરીમાંથી કોણ બહાર કાઢશે….બડી!? 

• ચાલો ઘરમાં જ ફૂંકાતા બીડી-સિગારેટ-તમાકું-ગૂટખાને હોઠ વચ્ચે દબાવતાં રહી પાનને ગલ્લે ‘કમાણી જ નથી સાલ્લી’ના નિસાસાઓની ગુલામગીરી કોણ દૂર કરાવશે…..રાજ્જા!!!?

• ઓહ્ફ..! સાચી હકીકત (સચ્ચાઈ) જાણ્યા વગર જ ‘હિંદુ આતંકવાદ’ કે ‘ઇસ્લામિક ટેરરિઝમ’માં જ અંદરોઅંદર ઝગડાંઓ કરી પેલા શૈતાનને ખુશ કરતા રહેવાની આપણી ખુદની જ અશિક્ષિત ગુલામગીરી કયો ગુરુ આવી દૂર કરશે….મારા ભાઈ?!!

અરે વ્હાલાંઓ…આ આ સિવાય બીજી અનેકાનેક ગુલામીમાંથી જ્યારે ફકત ‘જાતે જ’ મુક્ત થઈએ ત્યારે ફેસબૂકમાં કે પોતાના ‘ફેસ’ પર સાચું સ્ટેટસ મુકીશું તો જ ‘હેપી ઈન્ડીપેન્ડન્સ’નું પેન્ડન્ટ (હાર) પહેરવા લાયક બનીશું. બાકી હાલમાં જે પણ કરીએ છીએ માત્ર ‘દબાયેલા નાનકડાં સ્ટેટીક્સ બતાવવા……નહિ કે સાચે સ્ટેટસ ભરવા…”

મારી પંદરમી ઓગસ્ટ તો અંદર (ગટ્સમાં)થી આવે છે….તમારું કેમનું છે?

| ઈન્ડી-ફ્રેન્ડી મુર્તઝા પટેલ. |